Advertisement

అధ్యాపక వృత్తికి ‘సెట్’ అవుదాం!


Bavithaవిద్యా జీవితంలో సంపాదించే ప్రతి అర్హతా కెరీర్‌లో ఉన్నత స్థానాలకు ఎదిగేందుకు వెలుగు దీపమవుతుంది. ఆకర్షణీయ జీతభత్యాలు, ఆహ్లాదకరమైన పని సంస్కృతికి నెలవైన డిగ్రీ కాలేజీల్లో లెక్చరర్, విశ్వవిద్యాలయాల్లో అసిస్టెంట్ ప్రొఫెసర్ ఉద్యోగాలను పొందాలంటే స్టేట్ ఎలిజిబిలిటీ టెస్ట్ (సెట్)లో ఉత్తీర్ణత తప్పనిసరి. పీహెచ్‌డీ చేసేందుకు, జూనియర్ లెక్చరర్ల పదోన్నతులకు ఇలా పలు ప్రయోజనాలకు ప్రగతి బాటగా నిలుస్తున్న సెట్‌కు నోటిఫికేషన్ విడుదలైన నేపథ్యంలో స్పెషల్ ఫోకస్...

గతంలో ఆంధ్రప్రదేశ్‌లో డిగ్రీ కళాశాలల్లో అధ్యాపకులు, విశ్వవిద్యాలయాల్లో సహాయ ఆచార్యుల ఉద్యోగాలను పొందాలనుకునే వారికి ప్రత్యేక అర్హత పరీక్షగా ఏపీ స్టేట్ లెవెల్ ఎలిజిబిలిటీ టెస్ట్ (స్లెట్)ను నిర్వహించే వారు. ఆంధ్రప్రదేశ్ కాలేజ్ సర్వీస్ కమిషన్ (ఏపీసీఎస్‌సీ) 1997 ఫిబ్రవరి-1998 ఫిబ్రవరి మధ్యకాలంలో మూడుసార్లు ఈ పరీక్షను నిర్వహించింది. ఆ తర్వాత రాష్ట్ర ప్రభుత్వం ఈ కమిషన్‌ను తొలగించగా, యూజీసీ దాని అక్రిడిటేషన్‌ను రద్దు చేసింది. తర్వాత రాష్ట్రంలో స్లెట్ అనేది లేకుండా పోయింది. దీంతో రాష్ట్ర విద్యార్థులు యూనివర్సిటీ అసిస్టెంట్ ప్రొఫెసర్, డిగ్రీ కళాశాలల్లో అధ్యాపక ఉద్యోగాలకు అర్హత సాధించాలంటే యూజీసీ నెట్, సీఎస్‌ఐఆర్ నెట్ రాయాల్సి వచ్చేది. వీటిని ఇంగ్లిష్/హిందీ మాధ్యమాల్లో నిర్వహించడం వల్ల తెలుగు విద్యార్థులు ఇబ్బందిపడేవారు. దీన్ని దృష్టిలో ఉంచుకొని ఉమ్మడి ఆంధ్రప్రదేశ్‌ ప్రభుత్వం యూజీసీ అనుమతితో 2012, 2013లో ఏపీ సెట్ పేరిట పరీక్ష నిర్వహించింది. ఉస్మానియా విశ్వవిద్యాలయం ఈ బాధ్యత తీసుకుంది. రాష్ట్ర విభ‌జ‌న త‌ర్వాత‌ 2014లోనూ రెండు రాష్ట్రాలకు ఉమ్మడిగా స్టేట్ ఎలిజిబిలిటీ టెస్ట్ ఫర్ తెలంగాణ అండ్ ఆంధ్రప్రదేశ్ (సెట్-టీఎస్, ఏపీ)ను ఉస్మానియా వర్సిటీ నిర్వహించింది. ప్రస్తుతం ఆంధ్రప్రదేశ్ ప్రభుత్వం నిర్వహించ‌నున్న ఏపీసెట్ - 2016కు ఆంధ్రా యూనివ‌ర్సిటీ నోటిఫికేష‌న్ విడుద‌ల చేసింది.

మొత్తం సబ్జెక్టులు 31:
యూనివర్సిటీ గ్రాంట్స్ కమిషన్ అనుమతి మేరకు 31 సబ్జెక్టుల్లో ఏపీ సెట్- 2016ను నిర్వహిస్తున్నారు. అవి.. 1. ఆర్కియాలజీ 2. ఆంత్రోపాలజీ 3. కెమికల్ సెన్సైస్ 4. కామర్స్ 5. కంప్యూటర్ సైన్స్ అండ్ అప్లికేషన్స్ 6. ఎకనామిక్స్ 7. ఎడ్యుకేషన్ 8. ఇంగ్లిష్ 9. ఎర్త్, అట్మాస్ఫియరిక్, ఓషన్ అండ్ ప్లానెటరీ సెన్సైస్ 10. ఎన్విరాన్‌మెంటల్ సైన్స్ 11. జాగ్రఫీ 12. హిందీ 13. హిస్టరీ 14. జర్నలిజం అండ్ మాస్ కమ్యూనికేషన్ 15. లా 16. లింగ్విస్టిక్స్ 17. లైఫ్ సెన్సైస్ 18. లైబ్రరీ అండ్ ఇన్ఫర్మేషన్ సైన్స్ 19. మేనేజ్‌మెంట్ 20. మ్యాథమెటికల్ సెన్సైస్ 21. ఫిలాసఫీ 22. ఫిజికల్ సెన్సైస్ 23. ఫిజికల్ ఎడ్యుకేషన్ 24. పొలిటికల్ సెన్సైస్ 25. సైకాలజీ 26. పబ్లిక్ అడ్మినిస్ట్రేషన్ 27. సంస్కృతం 28. సోషియాలజీ 29. సోషల్ వర్క్ 30. తెలుగు 31. ఉర్దూ

అర్హత:
గుర్తింపు పొందిన యూనివర్సిటీ నుంచి కనీసం 55 శాతం మార్కులతో మాస్టర్ డిగ్రీ/పోస్ట్ గ్రాడ్యుయేషన్ (పీజీ) లేదా తత్సమాన కోర్సు పూర్తిచేసి ఉండాలి. నాన్ క్రిమీలేయర్ పరిధిలోని ఓబీసీ అభ్యర్థులు, ఎస్సీ, ఎస్టీ, వికలాంగులు కనీసం 50 శాతం మార్కులు సాధించి ఉండాలి. మాస్టర్ డిగ్రీ/పీజీ చివరి ఏడాది అభ్యర్థులూ దరఖాస్తు చేసుకోవచ్చు. 1991 సెప్టెంబర్ 19 నాటికి మాస్టర్ డిగ్రీ/పీజీ పూర్తై పీహెచ్‌డీ అభ్యర్థులకు 5 శాతం మినహాయింపు ఉంటుంది. అంటే వారికి పీజీలో 50 శాతం మార్కులు ఉన్నా సరిపోతుంది. సెట్ రాసేందుకు వయో పరిమితి లేదు.

ఫలితాల వెల్లడి:
ప్రతి సబ్జెక్టులో మూడు పేపర్లలో కనీస అర్హత మార్కులు సాధించిన వారితో జాబితా రూపొందిస్తారు. మూడు పేపర్లలో సాధించిన మార్కుల ఆధారంగా సబ్జెక్టు, కేటగిరీల వారీగా మెరిట్ జాబితా తయారు చేస్తారు. వీరిలో నుంచి ప్రతి సబ్జెక్టులో.. ప్రతి కేటగిరీ నుంచి టాప్ 15 శాతం మంది అభ్యర్థులను సెట్‌లో అర్హులుగా ప్రకటిస్తారు. ఫలితాలను ఉమ్మడిగానే విడుదల చేస్తారు.

పరీక్ష విధానం:
ఆబ్జెక్టివ్ విధానంలో పరీక్ష నిర్వహిస్తారు. మల్టిపుల్ చాయిస్ ప్రశ్నలుంటాయి. మొత్తం మూడు పేపర్లు ఉంటాయి. మొదటి పేపర్ అందరికీ ఉమ్మడిగా ఉంటుంది. రెండు, మూడు పేపర్లు సబ్జెక్టుకు సంబంధించినవి. ఒక్కో ప్రశ్నకు రెండు మార్కులు. నెగిటివ్ మార్కులుండవు. మూడు పేపర్లకు ఒకే రోజు రెండు దశల్లో పరీక్ష జరుగుతుంది.

పేపర్

ప్రశ్నల సంఖ్య

మార్కులు

సమయం

1

50 (మొత్తం 60)

100

75 నిమిషాలు

2

50

100

75 నిమిషాలు

3

75

150

21/2 గంటలు


కేటగిరీల వారీగా అర్హత మార్కుల వివరాలు

కేటగిరీ

పేపర్-1

పేపర్-2

పేపర్-3

జనరల్

40(40 శాతం)

40(40 శాతం)

75(50 శాతం)

బీసీ

35(35 శాతం)

35(35 శాతం)

60 (40 శాతం)

ఎస్సీ/ఎస్టీ/పీహెచ్/వీహెచ్

35(35 శాతం)

35(35 శాతం)

60 (40 శాతం)


ప్రిపరేషన్ ప్రణాళిక:
సెట్‌లో ప్రశ్నలను సంబంధిత సబ్జెక్టు పుస్తకాల నుంచి ఎంపిక చేస్తారు. పోస్టు గ్రాడ్యుయేషన్ అకాడెమీ పాఠ్యపుస్తకాల్లోని అంశాలను విశ్లేషణాత్మకంగా చదివి, సబ్జెక్టుపై పట్టు సాధించాలి. ప్రణాళిక ప్రకారం వీటిని చదివితే విజయం తథ్యం. సబ్జెక్టు పరిజ్ఞాన సముపార్జనతో పాటు జనరల్ స్టడీస్‌కు కూడా ప్రాధాన్యం ఇవ్వాలి. ఎందుకంటే మూడు పేపర్లలో ఏ ఒక్కదాంట్లోనైనా నిర్ణీత మార్కులు రాకుంటే శ్రమ అంతా వృథా అవుతుంది. సెట్ ప్రిపరేషన్‌లో భాగంగా సంపాదించిన పరిజ్ఞానం వివిధ పోటీ పరీక్షలకు కూడా ఉపయోగపడుతుంది.

ప్రిపరేషన్
సెట్‌లో మూడు పేపర్లలో అందరికీ కామన్‌గా ఉండేది మొదటి పేపర్. ఇది అభ్యర్థుల రీజనింగ్ సామర్థ్యాన్ని, గ్రహించే శక్తిని, ఆలోచనా సామర్థ్యాన్ని, సాధారణ పరిజ్ఞానాన్ని పరీక్షించేందుకు ఉద్దేశించింది. బోధన పద్ధతులు, విద్యా మనో విజ్ఞాన శాస్త్రం, డేటా అనాలిసిస్, రీజనింగ్, పరిశోధన ఆప్టిట్యూడ్ తదితర అంశాలకు సంబంధించిన ప్రశ్నలుంటాయి. ఈ ప్రశ్నల్లో చాలా వరకు అభ్యర్థి సాధారణ పరిజ్ఞానాన్ని పరీక్షించేవిగానే ఉంటున్నాయి. బీఈడీ చదివిన విద్యార్థులకు ఇవి చాలా సులువుగా ఉంటాయని చెప్పొచ్చు. యూజీసీ నెట్; సెట్ గత ప్రశ్నపత్రాలను పరిశీలిస్తే, ప్రశ్నల సరళి అర్థమవుతుంది.

  • సిలబస్ యూజీసీ-సీఎస్‌ఐఆర్‌నెట్ స్థాయిలో ఉంటుందని పేర్కొన్నప్పటికీ గత ప్రశ్నపత్రాలు ఆ స్థాయిలో లేవని సబ్జెక్టు నిపుణుల అభిప్రాయం.
  • యూజీసీ నెట్, సీఎస్‌ఐఆర్ నెట్‌కు సిద్ధమయ్యేవారు సెట్‌లో సులువుగా అర్హత సాధించవచ్చు. టీచింగ్ మెథడాలజీ, రీసెర్చ్ మెథడాలజీ, రీజనింగ్‌లకు సంబంధించి ప్రాక్టీస్ తప్పనిసరిగా ఉండాలి.
  • మొదటి పేపర్‌కు ఏదైనా ప్రామాణిక మెటీరియల్‌ను చదవడంతోపాటు మిగిలిన రెండు పేపర్లకు సంబంధిత సబ్జెక్టుల అకాడెమీ పాఠ్యపుస్తకాలతోపాటు సబ్జెక్ట్ నిపుణులు రాసిన పుస్తకాలను చదవాలి.
  • ఆయా సబ్జెక్టుల మూల భావనలను అర్థం చేసుకుంటూ అప్లికేషన్ ఓరియెంటెడ్ (అనువర్తిత) పద్ధతిలో లోతైన విశ్లేషణ చేస్తూ చదివితే సెట్‌లో విజయం సాధించొచ్చు. ఈ క్రమంలో యూజీసీ, సీఎస్‌ఐఆర్ నెట్ సిలబస్‌ను, పాత ప్రశ్నపత్రాలను కూడా పరిశీలించి ప్రశ్నల సరళి ఏ విధంగా ఉందో, ఏఏ అంశాలపై ప్రశ్నలు వస్తున్నాయో గమనించాలి.
Published on 10/16/2014 5:01:00 PM
టాగ్లు:
State Eligibility Test APSET 2016 Guidance for APSET 2016

Comment

Related Topics