Sakshi education logo

Advertisement

‘ఇంజనీరింగ్’ ఫీజులపై ఏఎఫ్‌ఆర్‌సీ కసరత్తు వేగవంతం

సాక్షి, హైదరాబాద్: తెలంగాణలోని ఇంజనీరింగ్ కాలేజీల్లో ఫీజుల ఖరారుకు ప్రవేశాలు, ఫీజుల నియంత్రణ కమిటీ (ఏఎఫ్‌ఆర్‌సీ) చర్యలు వేగవంతం చేసింది.
Edu news 10 రోజుల్లోగా ఇంజనీరింగ్ కాలేజీల్లో ఫీజును ఖరారు చేసేందుకు చర్యలు చేపట్టింది. కోర్టు ఆదేశాల మేరకు యాజమాన్య ప్రతిపాదిత ఫీజును అమలు చేయకుండా, ఫీజులను ఖరారు చేశాకే కౌన్సెలింగ్‌ను కొనసాగించేందుకు ఏర్పాట్లు చేస్తోంది. ఇందులో భాగంగా కోర్టును ఆశ్రయించిన 81 కాలేజీల ఫీజులను మూడు రోజుల్లో ఖరారు చేసేందుకు చర్యలు ప్రారంభించింది. జూలై1వ తేదీన 20 కాలేజీల ఫీజులను ఖరారు చేసేందుకు యాజమాన్యాలతో హియరింగ్ నిర్వహించింది. యాజమాన్యాలు ఇచ్చిన గత రెండేళ్ల ఆదాయ వ్యయాలు, తాజా ప్రతిపాదనలను ఏఎఫ్‌ఆర్‌సీ పరిశీలించింది. ఇప్పటికే ఆడిటర్లు ఆ కాలేజీల ఆదాయ వ్యయాలను సమీక్షించిన నేపథ్యంలో జూలై 1న ఏఎఫ్‌ఆర్‌సీ సమావేశమై వాటన్నింటినీ పరిశీలించి ఫీజులను ప్రాథమికంగా నిర్ణయించింది. మరోవైపు జూలై 2న మరో 30 కాలేజీల ఫీజులను కూడా ఖరారు చేసేందుకు యాజమాన్యాలతో హియరింగ్ నిర్వహించనుంది. జూలై 3న మరో 31 కాలేజీల ఫీజులను కూడా ఖరారు చేయనుంది. కోర్టును ఆశ్రయించి యాజమాన్య ప్రతిపాదిత ఫీజు అమలుకు ఉత్తర్వులు పొందిన 81 కాలేజీల ఫీజులను ఖరారు చేయనుంది. దీంతో యాజమాన్య ప్రతిపాదిత ఫీజు కాకుండా, ఏఎఫ్‌ఆర్‌సీ ఖరారు చేసే ఫీజుతో ప్రవేశాలను చేపట్టనున్నారు. మరోవైపు కోర్టుకు వెళ్లని 108 కాలేజీల ఫీజులను కూడా వచ్చే పది రోజుల్లోగా ఖరారు చేయాలన్న నిర్ణయానికి వచ్చింది. ఈ 108 కాలేజీల్లో రూ.50 వేల లోపు వార్షిక ఫీజు ఉన్న కాలేజీలకు 20 శాతం, రూ.50 వేల కంటే ఎక్కువ ఫీజు ఉన్న కాలేజీలకు 15 శాతం ఫీజులను తాత్కాలికంగా పెంచేందుకు ఏఎఫ్ ఆర్‌సీ యాజమాన్యాలతో సమావేశమై ప్రతిపాదించింది. వీటికి ఒప్పుకుంటే ప్రవేశాల కౌన్సెలింగ్ నిర్వహిస్తామని సూచించింది. తర్వాత కాలేజీ వారీగా, ఆదాయ వ్యయాల ఆధారంగా పూర్తి స్థాయి ఫీజును ఖరారు చేస్తామని వెల్లడించింది. ఇందుకు మెజారిటీ యాజమాన్యాలు అంగీకరించాయి. దీనిపై ఏఎఫ్‌ఆర్‌సీ ప్రభుత్వానికి నివేదిక కూడా పంపించింది. అయితే ఇప్పుడు తాత్కాలికంగా 15 శాతం, 20 శాతం ఫీజులను పెంచి కౌన్సెలింగ్ నిర్వహిస్తే విద్యార్థులు ఈ ఫీజుల ప్రకారమే కాలేజీల్లో చేరుతారు. ఆ తర్వాత పూర్తి స్థాయి ఫీజు ఖరారు చేసినప్పుడు, ప్రస్తుతం ఇచ్చిన 15-20 శాతం పెంపునకు మించి పూర్తిస్థాయి ఫీజులో కాలేజీ ల ఆదాయ వ్యయాల ఆధారంగా పెంపుదల వస్తే గందరగోళం తలెత్తుతుందన్న ఆలోచన ఏఎఫ్‌ఆర్‌సీ వర్గాల్లో వచ్చింది. జూలై 5 వరకు ఇంజనీరింగ్ ప్రవేశాల వెబ్ ఆప్షన్లను ప్రవేశాల కమిటీ వాయిదా వేసింది. కాబట్టి జూలై 6 నుంచి వెబ్ ఆప్షన్లను ప్రారంభించినా 10 వరకు గడువు ఇవ్వాల్సి ఉంటుంది. ఈలోగా అన్ని కాలేజీలకు పూర్తి స్థాయి ఫీజులను ఖరారు చేసి, కాలేజీ వారీ ఫీజులను విద్యార్థులకు అందుబాటులో ఉంచే లక్ష్యంతో ముందుకుసాగుతోంది.

టాప్ కాలేజీల ప్రతినిధులు హాజరు..
ఇంజనీరింగ్ ఫీజుల ఖరారు కోసం ఏఎఫ్‌ఆర్‌సీ చేపట్టిన హియరింగ్‌కు జూలై 1న టాప్ కాలేజీల ప్రతినిధులు ఏఎఫ్‌ఆర్‌సీ కార్యాలయానికి వచ్చారు. కాలేజీల ఆదాయ వ్యయాలను బట్టి ఏఎఫ్‌ఆర్‌సీ ఫీజులను ఖరారు చేసింది. వాటిపై యాజమాన్యాల అభ్యంతరాలను స్వీకరించింది. సంప్రదింపుల తర్వాత ఆయా కాలేజీల ఫీజులను ఖరారు చేసింది. జూలై 1న వర్ధమాన్, సీబీఐటీ, అనురాగ్, వాసవి తదితర కాలేజీల యాజమాన్య ప్రతినిధులు హాజరయ్యారు. అనురాగ్ గ్రూప్ ఆఫ్ ఇన్‌స్టిట్యూషన్‌‌స తరఫున పల్లా రాజేశ్వర్‌రెడ్డి హాజరయ్యారు. విచారణకు హాజరైన కొన్ని కాలేజీల యాజమాన్య ప్రతినిధులు జూలై 2,3వ తేదీల్లో మళ్లీ వస్తామని గడువు కోరారు.

అప్పీల్ కోరితే రూ. లక్ష :
వాసవి, శ్రీనిధి కాలేజీల ఫీజులపై సుప్రీంకోర్టు ఇచ్చిన తీర్పు నేపథ్యంలో.. ఏఎఫ్‌ఆర్‌సీ ఖరారు చేసిన ఫీజులను సవాల్ చేస్తూ అప్పీల్‌కు వెళ్లే పరిస్థితి లేదు. ఈ నేపథ్యంలో ఏఎఫ్‌ఆర్‌సీ ఖరారు చేసిన ఫీజులను రివ్యూ చేయాలంటే మళ్లీ ఏఎఫ్‌ఆర్‌సీకే అప్పీల్ చేసుకోవాలి. అందుకు రూ.లక్ష అప్పీల్ ఫీజుగా ఏఎఫ్‌ఆర్‌సీ నిర్ణయించింది. జూలై 1న జరిగిన సమావేశంలో ఈ నిర్ణయం తీసుకుంది. దీంతో కచ్చితంగా ఉండే కాలేజీలు మాత్రమే అప్పీల్‌కు వచ్చే అవకాశం ఉంటుందని భావిస్తోంది.
Published on 7/2/2019 2:57:00 PM

సంబంధిత అంశాలు