Sakshi education logo

Advertisement

గ్రూప్-2 ప్రిలిమ్స్‌లో 9 ప్రశ్నల తొలగింపు

సాక్షి, అమరావతి: రాష్ట్రంలో గ్రూప్-2 పోస్టుల భర్తీకి గత మే 5న నిర్వహించిన స్క్రీనింగ్ టెస్టుకు సంబంధించిన రివైజ్డ్ కీని ఆంధ్రప్రదేశ్ పబ్లిక్ సర్వీస్ కమిషన్ జూలై 5న ప్రకటించింది.
Education Newsఈ పరీక్షకు సంబంధించిన ప్రిలిమనరీ కీని మే 9న విడుదల చేసి దానిపై అభ్యర్థుల నుంచి ఇప్పటికే అభ్యంతరాలను స్వీకరించింది. వీటిని పరిశీలించిన అనంతరం ఈ రివైజ్డ్ కీని విడుదల చేసింది. సరైన సమాధానాలు లేని, తప్పుగా ఉన్న ప్రశ్నలు తొమ్మిదింటిని తొలగించినట్లు ఏపీపీఎస్సీ పేర్కొంది. ఏడు ప్రశ్నలకు సంబంధించిన సమాధానాల ఆప్షన్లను సవరించినట్లు కమిషన్ వెల్లడించింది. ఈ 16 ప్రశ్నలకు సంబంధించి అభ్యర్థులు నిర్ణీత ఫార్మాట్‌లో తమ అభ్యంతరాలను తగిన ఆధారాలతో జూలై 12లోపు కమిషన్‌కు సమర్పించవచ్చని కమిషన్ కార్యదర్శి పేర్కొన్నారు. కీ అండ్ అబ్జెక్షన్‌‌సఫార్మాట్‌ను https://psc.ap.gov.in వెబ్‌సైట్లో పొందుపరిచారు.

గందరగోళంగా రివైజ్డ్ కీ :
రివైజ్డ్ కీ గందరగోళంగా ఉందని అభ్యర్థులు ఆవేదన వ్యక్తంచేస్తున్నారు. అనేక ప్రశ్నలకు సంబంధించి సరైన సమాధానాలను ఇప్పుడు మార్చారని.. దీనివల్ల తమకు తీరని నష్టం వాటిల్లుతోందని గగ్గోలు పెడుతున్నారు. సరైన సమాధానాల్లేని వాటిగా గుర్తించి తొలగించిన 9 ప్రశ్నలకు సంబంధించిన ఫొటో కాపీలను ఏపీపీఎస్సీ వెబ్‌సైట్లో పెట్టింది. ఈ తొమ్మిదింటిలో ఒకేఒక్క ప్రశ్నకు సరైన సమాధానం చూపించి అందువల్ల దాన్ని రద్దుచేస్తున్నట్లు పేర్కొంది. మిగిలిన 8 ప్రశ్నలను ఎందుకు రద్దుచేస్తున్నారో కమిషన్ వెబ్‌సైట్లో వివరించలేదు. వీటి సమాధానాలు సరైనవేనని.. కానీ, కమిషన్ అన్యాయంగా వాటిని రద్దుచేస్తున్నట్లు ప్రకటించిందని అభ్యర్థులు వాపోతున్నారు. తెలుగు అనువాదంలో తప్పులు దొర్లినందున తొలగిస్తున్నట్లు ఏపీపీఎస్సీ వర్గాలు చెబుతున్నాయని అభ్యర్థులు వివరించారు. ఇంగ్లీషులో ప్రశ్నలు, సమాధానాలు కరెక్టుగా ఉన్నప్పుడు అనువాదంలో తప్పులున్నాయంటూ మొత్తం ప్రశ్నలను తొలగించడం ఎంతవరకు సబబని ప్రశ్నిస్తున్నారు. పోటీ పరీక్షల్లో అర మార్కుకు కూడా ఎంతో ప్రాధాన్యముంటుందని, ఈ తరుణంలో ఏకంగా 8 ప్రశ్నలను తొలగించడంతో అభ్యర్థులపై తీవ్ర ప్రభావం చూపుతోందని వారంటున్నారు. మరోపక్క.. ఏపీపీఎస్సీ విడుదల చేసిన కీలో కూడా తెలుగు అనువాదం ప్రశ్నలు గందరగోళంగా ఉన్నాయి. అసలు ప్రశ్నలు కానీ, వాటి సమాధానాలు కానీ ఏ ఒక్కరికీ అర్థమయ్యే పరిస్థితి కూడా లేదు. తెలుగు అనువాదం లిపి గందరగోళ పరిచేదిగా ఉండడంతో అది ఏ ప్రశ్నో కూడా ఎవరికీ అంతుపట్టకుండా ఉంది.
Published on 7/8/2019 3:06:00 PM

సంబంధిత అంశాలు